Asios (mitologie)
In die Griekse mitologie verwys Asios (Grieks: Ἄσιος, Asios) na twee persone wat tydens die Trojaanse Oorlog geveg het:
- Asios, seun van Hyrtakos, was die leier van die Trojaanse bondgenote wat afkomstig was van die Dardanelle of daar naby.[1] Hy was die seun van Hyrtakos en Arisbe. Laasgenoemde was die eerste vrou van Koning Priamos en dogter van Merops. Asios het 'n groep bestaande uit 'n klompie dorpe geleë aan beide kante van die Hellespont gelei, insluitende Miletus, Perkote, Abydos en Sestos. Laasgenoemde dorp was die enigste een wat aan die Europese (noordelike) kant van die Dardanelle geleë was; die res was geleë aan die Asiese (suidelike) kant. Asios het in die dorpie Arisbe by die Selleis-rivier gewoon. Asios het volgens Vergilius twee broers gehad genaamd Nisus en Hippokoon. Al drie het as bondgenote van Koning Priamos geveg by Troje. Tydens die aanval op die Achajers se muur was Asios die enigste soldaat wat nie geluister het na Hektor en Polydamas nie en nie afgeklim het van sy strydwa nie. Asios is tydens die aanval gedood deur die koning van Kreta, Idomeneus.
- Asios, 'n Frigiese leier, seun van Koning Dymas, en broer van koningin Hekabe van Troje. Asios het behoort aan 'n stam Frigiërs wat by die Sangarius gewoon het. Hy het twee seuns gehad, Adamas en Phaenops. In die Ilias neem Apollo Asios se vorm aan om Hektor aan te moedig om teen Patroklos te veg.[2] Hierdie Asios sterf nie in die verhaal van die Ilias nie, maar Dictys Cretensis vermeld dat hy gedood is deur Alias die Grote.
- Asios, seun van Imbrasos en metgesel van Eneas in Italië.[3]
Verwysings[wysig | wysig bron]
Bronnelys[wysig | wysig bron]
- Homeros, Die Ilias, Afrikaanse vertaling deur Johannes Petrus Jansen van Rensburg, 1952
- Homeros, Die Ilias, Engelse vertaling deur A.T. Murray, Ph.D. in twee volumes. Cambridge, MA., Harvard University Press; Londen, William Heinemann, Bpk. 1924. ISBN 978-0674995796. Aanlyn weergawe by die Perseus digitale biblioteek.
- Homeros, Homeri Opera in vyf volumes. Oxford, Oxford University Press. 1920. ISBN 978-0198145318. Griekse teks beskikbaar by die Perseus digital biblioteek.
- Vergilius, Eneïde. Theodore C. Williams, vertaler. Boston. Houghton Mifflin Co. 1910. Aanlyn weergawe beskikbaar by die Perseus digitale Biblioteek.
- Vergilius, Bucolics, Aeneid, and Georgics. J. B. Greenough. Boston. Ginn & Co. 1900. Latynse teks beskikbaar by die Perseus digitale biblioteek.
